डोरखबर/कालिकोट मंसिर १६ । जिल्लाको तिलागुफा नगरपालिका–४ मा वडाध्यक्ष पदको लागि भएको मतदानमा २ सय १७ महिला र १ सय ९४ पुरुष गरी जम्मा ४ सय ११ मतपत्र खसेको छ ।
६ सय ९ जना मतदाता रहेको सोही वडास्थित रहेको श्री कालिका माध्यामिक विद्यालय, राचुलि मतदान केन्द्रमा मङ्सिर १६ गते बिहान ७ बजेदेखि बेलुका ५ बजेसम्म मतदान भएको जिल्ला निर्वाचन कार्यालय प्रमुख धनबहादुर मल्लले जानकारी गराउनु भएको हो ।
बिहानदेखि शान्तिपूर्ण मतदान भइ सम्पन्न भएको मुख्य निर्वाचन अधिकृत आनन्दराज पन्तले बताउनु भएको छ । उहाँका अनुसार सर्वदलीय बैठकपछि आजै साँझबाट मत गणना गरिने छ ।
तितिलागुफा नगरपालिका–४ को वडाध्यक्षका पदका लागि ६ जनाको प्रतिस्पर्धा हुने भएको छ । नेपाली कांग्रेसबाट पैलबहादुर शाही, नेकपा (एमाले)बाट ऐनबहादुर शाही,माओवादी केन्द्रबाट नौशोभा शाही,नेमकिपाबाट खड्कराज शाही,रास्वपाबाट गगन बम र राप्रपाबाट गोगनबहादुर शाहीकोे उम्मेदवारी परेको थियो ।
२०७९ मा भएको स्थानीय तहको निर्वाचनमा माओवादी केन्द्रबाट वडाध्यक्ष निर्वाचित परबहादुर शाही सोहि वर्षको असोज २३ गते राँचुलीमा आएको खोलाको बाढीमा परी बेपत्ता भएका थिए ।
