काठमाडौँ । नेकपा माओवादी केन्द्रको महाधिवेशन आयोजक समितिको बैठक नेता जनार्दन शर्माले बहिष्कार गरेका छन् । प्रज्ञा भवन कमलादीमा सुरू भएको अन्तिम बैठकमा शर्मासहित सचिवालय सदस्य राम कार्कीले पनि बहिष्कार गरेका हुन् ।
असोजको ९ र १० गते बसेको केन्द्रीय समिति बैठकले मंसिरको अन्त्यमा विशेष महाधिवेशन गर्ने निर्णय गरेको थियो । तर माओवादी, नेकपा एकीकृत समाजवादी सहित ८ वटा वामपन्थी घटकसँग एकता गर्ने घोषणा गरेपछि उनी असन्तुष्ट देखिएका थिए ।
विगत चार वर्षदेखि नेतृत्व हस्तान्तरण र पार्टी पुनर्गठनको बहस गर्दै आएका शर्माले विशेष महाधिवेशन टार्न संयोजक पुष्पकमल दाहाल प्रचण्डले पार्टी एकता गरेको आरोप लगाएका छन् । बैठकमा सहभागी नभएका शर्मा समूहले ललितपुरमा छुट्टै पत्रकार सम्मेलन गरी ‘प्रगतिशील अभियान नेपाल’ घोषणा गर्ने तयारी गरेका छन् ।
शनिबार बसेको माओवादी आयोजक समितिको सचिवालय बैठकमा उनले एकीकृत समाजवादीसँगको एकता तत्काल रोक्न नेतृत्वलाई सुझाव दिएका थिए । तर उनको सुझाव प्रचण्डले अस्वीकार गरेपछि शर्मा अलग बाटो लागेका हुन् । चार दशकसम्म प्रचण्डलाई साथ दिएका शर्माको बहिर्गमनले पार्टीलाई क्षति पुग्ने माओवादीका नेता तथा कार्यकर्ताहरूले बताउन थालेका छन् ।
